Mentres o Parlamento de
Chipre votou en contra da quita aos aforradores/as como contrapartida polo
“rescate bancario”, o Goberno Central aprobou, por Real Decreto, unha quita aos
aforradores/as posuidores en contra da súa vontade de débeda subordinada. Ante
esta situación a representación da CIG en Novagalicia Banco, quere deixar claro
que está coa clientela, non cos verdugos.
Hoxe venres 22 de marzo do 2013, executarase o maior roubo “legal” aos
pequenos aforradores da historia de Galiza: a quita aos afectados e afectadas
pola comercialización en tramo minorista de débeda subordinada por parte de
Caixanova e Caixa Galicia. Estamos ante unha quita inmoral do aforro de
milleiros de traballadores e traballadoras, ante o que dende a CIG queremos
expresar a nosa máis completa condena. Seguimos demandando que se lle devolva o
100% dos seus aforros.
É significativo que os executores deste “corralito”, aprobado pola
maioría absoluta do Partido Popular, son destacadas persoas que no seu momento
participaron directamente nas emisións de preferentes e obrigas subordinadas:
Luís de Guindos: Parte das emisións de débeda subordinada
de Caixa Galicia, foron auditadas por PrincewaterhouseCoopers, que deu o visto
bo a aquelas emisións (curiosamente esta empresa é agora quen decide no proceso
de “arbitraxe”). O actual Ministro de Economía foi Directivo de PwC, empresa
que deu o visto bo á emisión de preferentes.
Antonio Carrascosa: O actual Director Xeral do FROB, nomeado
polo Goberno Central, era tamén Directivo de PrincewaterhouseCoopers xunto co
actual Ministro. Curiosamente agora é o FROB, que el dirixe, quen decidirá a
quita.
Fernando Restoy: As emisións foron autorizadas pola CNMV, Organismo
do que formaba parte o actual Presidente do FROB, nomeado tamén polo Goberno.
Carlos González: Outras emisións de débeda foron auditadas
por Deloitte; o actual integrante do Consello de Administración de Novagalicia Banco foi Presidente de Deloitte España.
Altos directivos das
Caixas, pasados e presentes: Está sen investigar o papel de diversas persoas que formaban parte da
alta Dirección de Caixa Galicia e Caixanova, os auténticos responsables da
quebra das Entidades e da situación de insolvencia das mesmas que levou á súa
nacionalización. Non só dos que están encausados na Audiencia Nacional, nin dos
Consellos de Administración (que eran meras comparsas por decisión propia), senón
das persoas que mandaban nas Caixas: as altas Direccións.
Algunhas persoas que formaron parte da alta Dirección das Caixas e que
polo tanto estiveron directamente implicadas na emisión e comercialización
indebida das preferentes, continúan na alta dirección de Novagalicia Banco.
Temos claro que cada persoa é responsable dos seus actos, tamén os
traballadores e traballadoras, pero máis alá de responsabilidades individuais,
colectivamente o cadro de persoal non é culpable.
Por último queremos amosar a nosa completa e absoluta solidariedade co
conxunto dos afectados e afectadas, agardamos que consigan os seus obxectivos,
que consideramos nosos.
Galiza, 22 de marzo de 2013
Sem comentários:
Enviar um comentário