Clasificación de Oficinas: unha nova retallada

A final de 2014 vence o Convenio Colectivo das Caixas (dende 2010 levamos acumulada unha perda salarial do 8,4%), pero se Novagalicia Banco é absorbida polo Banco Etcheverría, o novo Convenio de aplicación sería o da Banca Privada. Entre outras cuestións, desaparecería a Clasificación de Oficinas que regula o nivel profesional do persoal apoderado.

Na reunión do 16 de outubro de 2013, a CIG non asinou o Acordo de Clasificación de Oficinas, por entender que podía ser efémero (xa estaba a poxa en marcha), que era unha nova retallada encuberta das condicións laborais e que, ademais, careciamos de información sobre o seu impacto no peche do ano 2013, pero albiscábase que sería negativo.

Todas as eivas que argumentabamos, vénse agora reflectidas na Clasificación 2013, dun total de 515 oficinas, descenden 232. A maior parte das oficinas agrúpanse nos niveis máis baixos, malia que pechou un gran número de oficinas pequenas. A baixada das oficinas implica a baixa de nivel salarial e a baixada do salario mínimo garantido.

NIVEL	Clasificación Anterior	Clasificación Nova
0	27	10
1	74	51
2	151	126
3	128	152
4	63	126
5	72	50
Total	515	515

O posto de subdirector/interventor era de obrigada cobertura conforme ao “Laudo 86”; na nova Clasificación, a empresa eliminou a obriga de cubrir eses postos nas oficinas de nivel IV e V (176 oficinas). Iso permitiralle que nesas oficinas quede unha soa persoa.

As variables utilizadas non valoran a carga de traballo do persoal. A oficina con maior rateo de volume de negocio/empregado sitúase no posto 92; a segunda no 227.

Por todo o anterior, propuxemos un paquete de medidas de carácter transitorio, pero sobre todo, demandamos a apertura dun proceso de negociación para corrixir todas as eivas do acordo do 16 de outubro ratificado pola empresa, CCOO-UGT-CSICA e ASCA. Queremos ademais que se garanta no futuro a continuidade dunha clasificación.

Temos o convencemento de que a Clasificación de Oficinas pode ser o mellor incentivo, o maior recoñecemento ao traballo; ademais, trátase dun sistema que encaixa na nova normativa europea da ESMA (e da CNMV), nas directrices sobre políticas e prácticas de retribucións no sector financeiro.