O
31 de agosto de 2012, o Goberno Central aprobaba o RD 24/2012 de Reestruturación e Resolución Ordenada de Entidades
de Creto. Advertiamos daquela das gravísimas consecuencias dun decretazo
que fixaba as bases para o rescate á banca, e que situaba a NCG Banco S.A. en
“Resolución Ordenada”. Hoxe, a venda de EVO Banco
e a privatización de Novagalicia, son novos episodios froito daquel decreto.
NCG Banco S.A., está en “Resolución Ordenada”
despois de que o propio Goberno do Partido Popular decidira que só a madrileña
Bankia era sistémica; de aí a venda de activos (entre eles EVO) e o anuncio de
privatización urxente de Novagalicia Banco. Sabemos que todas e cada unha das
futuras opcións terá o seu custe laboral e de emprego, malia que semella que
para o goberno de Mariano Rajoy pouco lle importa.
Neste senso, a venda de EVO banco por 60
millóns de euros ten un grandísimo custe económico para o conxunto dos
contribuíntes (despois de inxectarlle inxentes recursos públicos, miles de
millóns de euros, para sanear o balance da rede exterior, e dos recursos
utilizados para a posta en marcha de EVO).
Outra cuestión é que ao abeiro da Resolución
Ordenada, do Plan de Reestruturación e do ERE IV, pactaron que ou se producía a
venda, ou o persoal sería despedido. Só a ameaza de despedimento de 590 persoas
pode facer que se valore como positivo o que é claramente negativo. Traballamos
baixo a espada de Damocles dun ERE tras outro.
Por se fora pouco, a Dirección da Entidade
anunciou que pretende emprazarnos á negociación dun novo Expediente Colectivo,
xa que a venda de EVO está condicionada a unha rebaixa das condicións salariais
(así como a que o Banco de España autorice ficha para EVO).
En relación ao comprador, Apollo, hai que
subliñar que este fondo foi fundado por ex-altos cargos do Drexler, un banco
norteamericano quebrado no ano 1990.
Para a CIG, a única opción viable dende o
punto de vista do país, laboral e social, é a conversión de Novagalicia nun Banco Público e Galego. O resto é
elixir entre o malo e o peor.
Sem comentários:
Enviar um comentário