Non podemos permitir que cobren 33 millóns máis

A nosa proposta para reducir a 1 euro os 33 millóns de euros que poden cobrar os ex-directivos por compromisos en materia de xubilación, foi rexeitada.

• A día de hoxe a incerteza sobre o futuro da Entidade é absoluta, froito dunha pésima xestión por parte das cúpulas directivas e dos continuos cambios legais. Ademais sufrimos un ERE tras outro, hai despedimentos inxustos, recortes nos salarios e de dereitos.
• A cidadanía sufre recortes nos servizos básicos, en tanto a nosa empresa recibiu inxentes recursos públicos, para ser privatizada.
• A clientela sofre as consecuencias da mala xestión e baixa valoración, sen que se albisquen saídas satisfactorias.
• A empresa pechou o ano 2011 en perdas.
• Malia todo isto os ex-directivos, responsables desta situación, teñen pendentes de cobrar novas indemnizacións multimillonarias, 33 millóns de euros, sen que a Dirección e o Consello de Admi-nistración teñen feito nada para evitalo.

Resulta especialmente doloso que o Ministerio de Economía e o Banco de España, responsables do FROB, non teñan dado un só paso para reducir esa nova indemnización, despois da alarma social suscitada polas primeiras indemnizacións.

Neste senso, como aconteceu coas primeiras indemnizacións, é a CIG quen debe tomar a iniciativa, e de aí a nosa proposta para negociar un acordo en materia de previsión social substitutivo dos compromisos existentes con anterioridade, que pretende rebaixar o importe a cobrar por Pego, Paredes, Gorriarán ou Rodríguez Estrada.

A nosa proposta foi rexeitada pola Dirección, que nada tiña feito para evitar eses novos pagos. Alegan incerteza xurídica. Pero anunciaron que levarán adiante a conxelación das nosas achegas conforme ao ERE III. Recortar aos ex-directivos xéralles dúbidas, recortarnos aos traballadores/as é doado.

Nós temos a certeza de que o que propoñemos é viable e xusto, laboral e socialmente. Neste senso, trasladaremos ao Consello de Administración, pero tamén ao FROB, a nosa proposta para que soliciten un informe xurídico que busque vías para evitar un novo pago multimillonario. Unha empresa que tivo perdas non pode repartir beneficios aos malos ex-directivos.