Abordamos o futuro coa Dirección

O luns 22 de outubro mantivemos unha reunión co Presidente da Entidade José María Castellano, o Conselleiro Delegado, Cesar González-Bueno Mayer e o equipo de RRHH. Este comunicado pode ser reiterativo para as persoas que asistiron as nosas asembleas de traballadores/as, xa que a situación que expuxemos nas mesmas é na que estamos, tal e como debullou o Presidente. O noso futuro está en mans da Troika (UE, BCE e FMI) despois da cesión de soberanía por parte do Goberno Central.

•  A Troika (UE, BCE, FMI) ten o control sobre o futuro da Entidade, conforme ao MOU. O Goberno e a Dirección van e argumentan, pero non hai negociación.
•  A Entidade non será liquidada, pero entramos en Resolución Ordenada conforme ao RD 24/2012 (malia que se resistiu a utilizar a expresión). 
•  Hai un 90% de posibilidades de seguir a través dunha banca ponte, coa obriga de reestruturarnos durante 3 anos, entrando en fase de reprivatización do 3º ao 5º ano. 
• Eles van a Bruxelas a falar exclusivamente de NCG Banco S.A.; o Banco Gallego non entra no paquete. 
• A Troika esixe unha reestruturación, din que a cidadanía europea pon o diñeiro para o rescate e que os custes da mesma non poden ser elevados. 
• Tal e como dixemos, dentro da Resolución Ordenada é obrigatoria a venda de negocio, de aí a venda de EVO. A Troika impón “achatarrar” o que non se venda. 
• Se o comprador de EVO é un banco estranxeiro que non teña SSCC no Estado, permitiría ir a un contrato de servizos e manter o emprego nos nosos SSCC. 
• O UGAS xestionara os activos durante 1 ano, prorrogable a 2, a través dun contrato de xestión. O persoal continuará ligado laboralmente a NCG Banco S.A. 
• A Entidade presentouse ao concurso informático para a xestión, se gañan son 4 postos de traballo. 
• Os fitos que restan son: Aprobación plan de Recapitalización; Traspaso de activos ao Banco Malo; Absorción Perdas e Recapitalización. A posible quita á clientela con débeda subordinada sería despois da recapitalización (o que din que beneficiaría á clientela), e que non hai ningunha quita aprobada. 

A proposta da CIG para a Troika, dado que é quen manda, foi:

• Somos unha entidade sistémica na Eurorrexión Galiza/Norte de Portugal. 
•  Nós insistimos en poñer en valor ante Bruxelas a capacidade de dar servizo a clientela e favorecer a inserción financeira, nomeadamente no rural galego. 
• A viabilidade da empresa é posible se non se restrinxe a súa capacidade comercial (que non se pechen máis oficinas, nin se despida a máis persoal). 
• No mesmo senso, hai que dar unha saída ao problema da débeda subordinada. 
• A concentración bancaria supuxo unha diminución da competencia, manter a entidade favorece a competencia no sector financeiro. 
• Se fora preciso calquera proceso de reestruturación debe ser periodificado no tempo (durante os 5 anos) para evitar que sexa traumático, é dicir, que cada ano se poda ofertar aos maiores de 55 a súa posible saída de aquí ata o 2017, para que o proceso sexa "ordenado" tamén laboralmente.