Cambiamos de dono, pero non de conto

Segundo a Dirección saínte, Novagalicia Banco estaría á cabeza das probas realizadas polo BdE con carácter previo aos test europeos, certamente despois de ser rescatada e salvada con inxentes recursos públicos. Un dato que, de ser certo, formaría parte da trama agochada no proceso de poxa.

Moitos nos preguntamos sobre o motivo da urxencia na poxa de Novagalicia Banco, unha poxa que trasladou gran incerteza ao cadro de persoal, despois de que o Goberno/FROB decidira non incluír a garantía de emprego. Quizais os resultados deses test sexan un dos motivos: había que malvendela rápido, antes de que se soubera que era a Entidade máis viable e solvente. Unha estafa en toda regra. E sobre o “prezo da venda”.... falaremos outro día.

Xogaron novamente co medo; voceiros do PP chegaron a dicir publicamente, transmitindo incerteza á clientela, que se non se vendía, Europa podía reclamar a devolución do rescate e non estarían garantidos os aforros da clientela. Mentireiros.

Nos vindeiros meses iremos coñecendo parte das condicións ocultas da poxa, entre elas as consecuencias laborais, pero outras xa son coñecidas:

·          Cando dixeron que se “mantería o emprego”, a CIG solicitou o peche do ERE IV; a resposta do novo propietario (nos medios de comunicación) foi que seguiría aberto. Hoxe, como todos e todas sabedes, quedan 74 oficinas por pechar e 350 saídas por cubrir que serán baixas ou despedimentos.

·          Mentres as colas saturan a maior parte das oficinas e o persoal fai horas extras ilegais, a Dirección pode aplicar reducións de xornada e salario do 20% e 34%, mantendo ao mesmo tempo contratos temporais.

·          A Entidade foi adquirida cuns activos que continúan á venda, o que afectará aos postos de traballo de UGAS.

·          Independentemente de que podan vir cun novo ERE, a absorción polo Etcheverría pode levar ao cambio para o Convenio da Banca Privada. Neste senso, o Expediente de modificación substancial pola venda de oficinas ao Etcheverría, asinado por CCOO-CSICA-UGT-ASCA senta un precedente negativo, tal e como advertimos.

Por último, despois da venda, din que procede renegociar o Plan de Reestruturación pactado polo Goberno Español e a Comisión Europea; este tiña dúas patas: a redución de persoal e as restricións do negocio. Sendo ambas importantes (non hai viabilidade sen plan de negocio, pero non hai plan de negocio sen traballadores e traballadoras), consideramos que sería positivo que a nova Dirección se reunise coa representación sindical para negociar o Plan a presentar ante Bruxelas e podamos actuar de xeito conxunto ante as autoridades da Comisión Europea. Por este motivo, xa temos solicitada unha reunión coa Dirección do Banco.