Toca mobilizarse, ou non?

Despois da escisión de EVO Banco, efectuada o pasado día 9 de decembro, o cadro de persoal sufriu un novo recorte de 589 persoas. E despois desta operación, queda pendente a transmisión definitiva de NCG Banco S.A., que se achega ao seu final, sen que ninguén pareza ter presente a realidade do cadro de persoal que a conforma.

Con este motivo, as Seccións Sindicais de ASCA, CIG e UGT queremos facer visible o temor que debido á consecuencia da venta está soportando o persoal. Somos coñecedores de cal é o nivel de desmotivación real que se está sufrindo e que, como boa parte do cadro de persoal está en Galiza, cabería pensar en aplicar o típico “Malo será”.

Cremos que non debemos fialo todo á sorte, e que algo temos que dicirlle tanto a quen nos vende como a quen estea planeando a compra: SOMOS UNHA EMPRESA NA QUE TRABALLAMOS PERSOAS, QUE LEVAMOS SUFRINDO MÁIS DE TRES ANOS DE DISTINTOS APRETÓNS LABORAIS. E NON QUEREMOS MÁIS. DENDE O INICIO DA FUSIÓN FORON APROBADOS PLANS QUE SUPOÑEN UNHA REDUCIÓN DE PERSOAL QUE SUPERA O 50%. NADA SEMELLANTE SE TEN PRODUCIDO NO SECTOR.

O ano pasado aprobouse en Bruxelas un proxecto para esta empresa, que se está cumprindo perfectamente e que nos sitúa nun grao de cumprimento superior ao previsto. Reclamamos que se revise para, en todo caso, xerar máis postos de traballo na empresa.

NON PODEMOS ADMITIR UNA TRANSMISIÓN DA ENTIDADE CUNHA PERDA ENGADIDA DE POSTOS DE TRABALLO.

Para tentar evitalo, deseñamos un calendario de mobilizacións que comezaría cunha concentración de delegados/as de ASCA, CIG e UGT, diante do Banco de España na Coruña, co fin de entregarlle ao Gobernador do dito banco un escrito pedindo o cumprimento dos plans establecidos no que respecta ao emprego. Seguidamente, dariamos traslado ao Consello de Administración da Entidade, copado polo FROB, dunha carta esixindo que, á hora da venta, a mellor oferta sexa a que respecte máis postos de traballo na empresa. A esta concentración convidamos a calquera persoa que queira e poda sumarse, a que asista, sexa da organización que sexa.

Dentro do ano que remata, promoveremos unha concentración do persoal, coas súas familias e amizades, na cidade de Santiago de Compostela, a celebrar o sábado día 21 de decembro, na que mediante dous únicos lemas, “NCG: COMPROMISO POLO MANTEMENTO DO EMPREGO E CON GALIZA” e “O QUE COMPRA, TAMÉN DEBE COMPROMETERSE CO MANTEMENTO DO EMPREGO” daríamos traslado á sociedade da nosa aposta por querer seguir traballando, e nos lugares nos que o facemos agora.

Estas convocatorias están abertas a toda organización que queira sumarse ás mesmas (sindical, empresarial, política, etc.).

DEFENDAMOS O QUE É NOSO

                          O NOSO COMPROMISO É O EMPREGO

               O QUE COMPRA, QUE TAMÉN SE COMPROMETA