Encontro co BNG para avaliar o proceso de privatización

O BNG convidou á representación sindical de Novagalicia Banco a unha reunión para analizar o proceso de privatización e as posibles repercusións sociais e laborais derivadas do mesmo. Asistiron todas as organizacións con presenza na empresa: CIG, CCOO, CSICA, UGT, ASCA e CGT, e por parte do BNG estivo presente o voceiro nacional, Xabier Vence e o Secretario de Organización, Bieito Lobeira.

A CIG considera como moi positiva a inicia-tiva do BNG de ter en conta á represen-tación sindical nun proceso que pode ter graves repercusións laborais. Os fondos deberan, cando menos, cumprir o Plan de Reestruturación aprobado por Bruxelas, e unha absorción por un banco afectaría aos SSCC e habería duplicidades na rede.

Na reunión houbo coincidencia en destacar as graves repercusións sociais e para a economía galega deste proceso, no que a Xunta de Galicia adoptou inexplicablemente o papel de mero espectador, así coma das posibles repercusións laborais dunha hipotética absorción por outra Entidade. Tamén na necesidade de transformar Novagalicia Banco nunha Banca Pública e Galega.

O BNG fixo unha oferta á representación sindical, que de aceptar faría extensiva ao resto dos grupos políticos, para iniciar un proceso de mobilizacións para paralizar a poxa da Entidade e a súa conversión nunha Banca Pública e Galega. Na CIG xa temos aprobada unha campaña de mobilizacións neste senso e amosamos o noso ánimo de converxer co resto de organizacións na defensa do emprego.

Temos previsto tamén, solicitar reunións cos Grupos Parlamentares e cos Grupos municipais de Vigo e a Coruña para poñer sobre a mesa a posible perda de emprego, nomeadamente nestas dúas cidades, se se leva adiante a entrega de Novagalicia Banco a capital privado. Solicitamos do BNG que traslade iniciativas en contra do proceso tamén ao Parlamento Galego e ao Congreso dos Deputados para que, no caso de producirse a venda, o Estado teña en conta o mantemento do emprego, dado que dende o proceso de fusión o cadro de persoal reduciuse en 3.000 persoas.

Non queremos a privatización por principios, pero tamén porque sabemos cal pode ser o final: co proceso de privatización están en grave perigo centos de postos de traballo. É agora, cando se definen as condicións, cando toca moverse.