Fronte aos despedimentos: Asemblea Traballadores e traballadoras

1 de cada 2 persoas que traballan nesta empresa, serán despedidas. Dá igual o que fagamos individualmente para tratar de salvar o posto de traballo, ese é un dato obxectivo. Ademais, o futuro non está garantido. É por iso que queremos compartir con vós a situación que estamos vivindo e colectivizar a defensa dos postos de traballo.

O día 20 de decembro ás 18:00 horas en Santiago terá lugar a asemblea máis importante da nosa historia. Temos que abordar o futuro, para falar de emprego e do mantemento dos postos de traballo. 

A forza dos sindicatos reside nos traballadores e traballadoras. Só a vosa participación masiva pode evidenciar que estamos dispostos a defender o noso traballo e, polo tanto, pode contribuír a situarnos nun novo escenario de negociación máis favorable ás nosas posicións. 

Queremos facilitar os desprazamentos a Santiago, para o que haberá un servizo de autobuses dende A Coruña, Lugo, Ourense, Pontevedra e Vigo. Podedes apuntarvos poñéndovos en contacto con calquera delegado/a, nos correos das distintas seccións sindicais ou no correo asambleaconjunta@gmail.com (indicando o voso nome e cidade de partida). Lembrámosvos que o propio xoves 20 (día da asemblea) e os dous seguintes, a xornada laboral é das 8 ás 15 horas. 

Seguimos co calendario fixado e o día 10 concentrámonos diante do Banco de España na Coruña e na Delegación do Goberno, facendo entrega de senllos escritos dirixidos ao Gobernador e ao Ministro de Economía, reiterando a nosa solicitude de reunión co FROB. Así mesmo, o día 13 de decembro trasladarémonos á Xunta de Galicia para reiterar a solicitude de reunión co Presidente Alberto Núñez Feijoo. O impacto económico, social e laboral da reestruturación fai precisa a participación da Xunta neste proceso. 

Estamos vivindo o noso particular “Pesadelo antes do Nadal”, estamos nas mans dos Mr. Scrooge de quenda. É preciso alzarnos coma unha soa voz para defender os postos de traballo, polas nosas familias.