Non valen saídas individuais, teñen que ser colectivas

As ovellas comen da man do dono

Esta ben que un sindicato faga nun comunicado un relatorio do que estamos vivindo os traballadores e traballadoras da Entidade.O que non está ben é non achegar ningunha alternativa sindical e que a solución sexa que cada un dos traballadores/as  “mandemos a tomar Fanta” a  non sei quen. Tan simpático como inutil.

Non vale acatar e apoiar todas e cada unha das medidas da empresa/FROB, a través da sinatura de ERE´s; modificacións substanciais; recortes no plan de pensións, etc, e despois pedirlle ao persoal que se enfronte individualmente.

Moitos dos problemas que vivimos son froito dos recortes de persoal, aprobados por algúns sindicatos. As oficinas e SSCC están en cadro e non damos feito, algo que á Dirección da empresa/FROB dálle igual.

A resposta á situación que estamos vivindo, que é unha auténtica desfeita, ten que ser colectiva, nunca individual. Para iso estamos os sindicatos, cando menos é o modelo sindical no que acredita a CIG.