Todo está aberto, nada está pechado.

A Troika (UE, BCE, FMI) e o goberno do Estado definen aínda os termos do rescate, queda por definir a posible existencia do banco malo; si haberá fusión das nacionalizadas; como se articulará o rescate e as condicións do mesmo; o único claro é que quen reciba axudas públicas deberá acometer un novo proceso de reestruturación. Con este escenario fomos convocados a unha reunión co Presidente JM Castellano.

Non recibimos nin un só documento, o Presidente fixo unha exposición optimista da situación e unha defensa do seu proxecto (basicamente entrada maioritaria de mais capital público e en menor cantidade de investidores privados, o que lle permitiría a estes tomar vantaxe cara a futura privatización) o que creemos non semella do gusto das autoridades.

A nosa posición non mudou:

 

·         Calquera axuda pública debería estar condicionada ao mantemento do emprego, dificilmente a Entidade poderá ser competitiva (e polo tanto devolver as axudas) si continua a voráxine de destrución de emprego que empeora a calidade de servizo e debilita a posición no mercado.

·         Si hai que sanear con diñeiro público, queremos que a entidade continúe no futuro como unha banca pública galega con vocación de servizo á cidadanía e con vocación de permanencia no tempo. 

·         Que esta recapitalización se faga de xeito inmediato, dando solución ademais á clientela con preferentes e obrigas, co fin de restablecer a confianza e credibilidade da Entidade. 

·         Que se proceda ao nomeamento dunha nova Dirección profesional que antepoña a viabilidade e o futuro da entidade, ao seu negocio.  Apartando ademais aos directivos vinculados as altas Direccións anteriores.

Como xa advertimos  novas axudas implican unha maior reestruturación, feito que xa anunciou o Ministro no Congreso dos Deputados e tal e como dicta a lexislación europea. Pero segundo o Presidente do banco como xa se tomaron medidas “agarda” que non pedirán maiores sacrificios.

Ademais e dada a incerteza sobre o futuro do Banco Gallego (o seu Consello de Administración retirou da Xunta de Accionistas a ampliación de capital) o Presidente quixo “tranquilizarnos” indicando que todo está aberto, pero que unha posible absorción sería boa para novagalicia, xa que así a nova reestruturación podería afectar ao Banco Gallego mais que a novagalicia. Argumento que no sindical tranquiliza pouco e que con todos os respectos é pouco rigoroso.  Achegar 800 persoas mais, o cadro de persoal do Banco Gallego, a unha empresa que debe ser reestruturada, en ningún caso é positivo. 

Fixo unha serie de afirmacións sobre a visión que tivo o BdE sobre os plans de recapitalizacións presentados (cos criterios anteriores ao rescate), que non nos corresponde a nos facer pública, por moito que a propia Dirección a filtre en nome dos "sindicatos" a algún xornal.  

En definitiva unha reunión mais co único obxectivo de convencernos da bonanza do seu proxecto que non para despexar incertezas e da que saímos mais preocupados do que entramos, por entendermos que se fan afirmacións co animo de calmar ao persoal malia que sexan pouco rigorosas.