Agora que é cando se decide un posible ERE IV é o momento de actuar

Neste momento, en que se deciden as condicións do rescate, é o momento de exercer presión para que os axustes en materia de emprego, que implica o mesmo, sexan os menores posibles, nomeadamente naquelas entidades nas que xa houbo recortes considerables de postos de traballo.

O rescate implica que a supervisión do sector financeiro recaerá sobre a Troika (FMI, UE, BCE). Todos e todas somos conscientes da dureza que impoñen ditos organismos cando se producen intervencións, non hai lugar para o conformismo, nin por agardar mansamente acontecementos. A CIG ten o compromiso de defender todos e cada un dos postos de traballo, hoxe é momento para evitar que veña un paquete pechado de despedimentos puros e duros.

Neste senso o luns 18, delegados da CIG en Novagalicia Banco, Banco Gallego e nas empresas auxiliares, mantivemos unha reunión co BNG, respondendo a un convite desta organización, na que avaliamos a situación actual e as posibles consecuencias socio-laborais do rescate bancario. Nesa reunión o BNG estivo representado polo deputado do Congreso e candidato á Xunta, Francisco Jorquera, o parlamentario galego, Henrique Vieitez, e Montse Prado e Rafa Villar (integrantes da súa Executiva Nacional). Despois da xuntanza tivo lugar unha rolda de prensa, que estaba anunciada con anterioridade. O nacionalismo político amosou a súa disposición para continuar colaborando, trasladando aos distintos foros nos que está presente (nomeadamente nos Concellos, Parlamento Galego e Congreso dos Deputados), iniciativas para esixir o mantemento do emprego.

O futuro ERE IV, estase fraguando hoxe, é o momento de actuar e lembrar que no noso caso non é preciso, xa levan tres ERE’s e 2.000 postos de traballo amortizados.

A Dirección, como noutras ocasións, contraprogramou cunha reunión o mesmo día á mesma hora. Reunión na que participamos. Chegamos á reunión (o día 18 ás 10:30) e a Dirección, que sabía da nosa rolda de prensa, esixiu un compromiso de confidencialidade ou dixo que non se celebraría. A única teima da Dirección foi, coma sempre, que non déramos a nosa opinión, que non defendamos publicamente os postos de traballo e que non defendamos a transformación nunha Banca Pública.

Dende a CIG deixamos claro que somos representantes dos traballadores e das traballadoras, que non asistimos a reunións a título individual, polo que avisamos que temos a obriga de informar aos nosos representados/as. Ademais a nosa Central Sindical (coma outras), ten as súa opinións sobre o rescate que non pensamos calarnos.

Na dita reunión a Dirección non informou de nada destacable, limitándose a dicir que hai un ERE en marcha que vai a respectar, que están traballando para seguir en solitario, que agardan que o FMI teña en conta os “deberes” xa realizados, etc..., na liña do que xa coñecedes polas notas internas.

Por último, destacar que a presión que exercemos para evitar o pago da xubilación blindada por parte dos ex-directivos (que xa cobraron a prexubilación) comeza a dar o seu froito: o Parlamento Galego acordou por unanimidade unha proposición para que o Goberno evite os pagos, acadando un acordo igual no Congreso dos Deputados. Agardamos que a nosa alerta permita que Novagalicia Banco aforre os 33 millóns dotados para a xubilación de catro ex-directivos, o cal sería unha boa noticia.