A reforma da negociación colectiva contamina o Convenio

Manifestación en Madrid contra a reforma da negociación

A negociación colectiva, os Convenios, é outro dereito histórico dos traballadores e das traballadoras, cuxa liquidación é inminente coa reforma da negociación colectiva que implantará unha nova estruturación entre os Convenios de Sector e os de empresa. As Caixas queren anticipar a reforma na negociación do Convenio tanto na estrutura do mesmo coma nos contidos coa única oposición da CIG.

Nós apostamos por un Convenio Sectorial de ámbito galego. Hai materias que, por ser moi sensibles, non sería positivo negocialas a nivel de empresa, establecendo diferentes condicións en cada entidade dentro do mesmo territorio (por exemplo horarios), ademais pode facer que para os directivos e accionistas, as condicións laborais se convertan nun elemento a recortar para conseguir reducir custes en relación á competencia dentro dun mesmo sector de actividade.

Ademais, a reforma da negociación colectiva pretende dotar de maior flexibilidade interna ás empresas (introducindo maior mobilidade xeográfica, mobilidade funcional, a xornada flexible, o salario flexible e cláusulas de descolgue), puntos que a ACARL aborda nas súas propostas. Non se trata de que debamos facer un “sacrificio” ante a situación das Caixas/bancos, senón de aplicar anticipadamente no sector a reforma da negociación colectiva.

Proposta da ACARL

Duración: 4 anos.

Salarios: conxelación durante 2011-2012 e unha revisión durante 2013-2014. A suba salarial final en 4 anos será do IPC menos un 4,5%; a maiores, piden a redución dos trienios ao 2% do salario base e incluír a cláusula de descolgue en base á reforma.

O IPC está situado nun 3,6%, polo que a proposta de conxelación e recorte dos trienios levaría a un importante recorte do poder adquisitivo nun momento inflacionista. Para a CIG é importante manter as nosas reivindicacións e loitar por uns incrementos salariais dignos.

Mobilidade xeográfica: eliminar os 25 quilómetros polos seguintes tramos e compensacións: de 25 a 30 km.: 3.000€; 51 a 100 km.: 6.000€; de 101 a 200 km.: 16.000€; de 201 a 300 km.: 18.000€ e +300 km.: 20.000€. Dende a CIG non aceptamos que os cambios de destino sexan arbitrarios.

Horarios: negociaríase a nivel de empresa o horario e a súa distribución. Esta posibilidade abriría unha posible guerra de horarios.

Clasificación Oficinas: matizaron a súa proposta inicial e piden suprimir as subdireccións nos niveis “C” e “D”. Continua a ser inaceptable.

Por último, dicir que hai sindicatos que aceptan cousas na mesa e despois din outras nos comunicados públicos. Non é crible que quen asinou ERE´s no sector, CCOO, UGT, CSICA, CIC (ASCA) agora pidan que as empresas renuncien a utilizalos.

A vindeira reunión está prevista para o 4 de maio.